Kahaan kho gaya woh?

#poetry #hindi

Kahaan kho gaya woh ladka,

jo kad mein tha mujhse kum

Kahaan kho gaya woh ladka,

jiski mujhse thi dubli baahein

Kahaan kho gaya woh ladka,

jo zulfon me hawaon ko karta tha kaid

Kahaan kho gaya woh ladka,

jo nangi aakhon se dekh paata tha dur

Kahaan kho gaya woh ladka,

Jise log mere naam se pukaarte hain

Kahaan kho gaya woh ladka,

Jo beete dino mein, mai tha kabhi

Kabhi dikhe kahin toh batana,

Bohot arsey se nahi hui hai mulakat

Ek baar fir aangan me laite,

udte hawai jahaazon ko taakna hai

Ek baar fir khuli dopahari mein,

daabe pao, balla liye nikalna hai

Ek baar fir paanch rupiye wali,

kohni se tapakti icecream chaatni hai

Ek baar fir cycle pe ghanti baja

beparwah galliyon me ghoomna hai

Ek baar fir apne kamre ko antrangi

prayogshala bana, itwaar jeena hai

Ek baar fir usi maasoomiyat se bhoot,

bhagwan, insaaniyat me yakeen karna hai

Ab jab wapas laut aaya hai woh ladka,

toh saala kahin kho gaye hain woh din!

---

I had never written a piece in Hindi before this one.

A friend asking me for feedback on a Hindi poem she had penned, set things into motion. After all, I first think in Hindi and then translate it into English!